Azərbaycanın iki boksçusu dünya çempionatına qələbə ilə başlayıb

İspaniyanın Alikante şəhərində gənc boksçular arasında dünya çempionatına start verilib.

Apasport.az saytının məlumatına görə, mundialın ilk günündə Azərbaycan milli komandasının 2 üzvü mərhələ adlayıb.

Boksçularımızdan Sənan Hətəmov (67 kq) Neri Kanaviri (Boliviya) ilə qarşılaşıb. 1/32 final mərhələsi çərçivəsində baş tutan görüş təmsilçimizin qələbəsi ilə başa çatıb. O, rəqibini tam üstünlüklə məğlub edib. Hətəmov növbəti döyüşündə ilk mərhələdən azad olan kanadalı Yakub Blaislə üz-üzə gələcək.

Mehparə Məmmədova (48 kq) da rinqdən qalib ayrılıb. 1/16 final mərhələsində Lyuba Atanasova (Bolqarıstan) ilə döyüşən boksçumuz rəqibinin üçüncü raundda diskvalifikasiya olunması səbəbindən növbəti görüşə vəsiqə qazanıb. Məmmədova ikinci cəhdində monqolustanlı Saruul Batsayxanla qüvvəsini sınayacaq.

Onlardan fərqli, Tural Sarıyev (48 kq) Titivat Flonqauraiyə (Tayland), Rza Rzazadə (75 kq) Antonio Leyvaya (Argentina) məğlub olaraq, mübarizəni dayandırıb.

Qeyd edək ki, dünya çempionatında bu gün daha 2 boksçumuz mübarizəyə qoşulacaq. Kamil Babayev (54 kq) Riçard Erazo Çaçanı (Ekvador), Aysu Dərvişova (57 kq) Quadalupe Peresi (ABŞ) sınağa çəkəcək.