Cerrard “Əl-İttifaq”ın məşq vaxtlarını “Liverpul”un oyunlarını nəzərə alaraq müəyyənləşdirdiyini etiraf edib
https://mail.qelebe.az//uploads/photo/cerrard-el-ittifaqin-meshq-vaxtlarini-liverpulun-oyunlarini-nezere-alaraq-mueyyenleshdirdiyini-etiraf-edib.webp
Səudiyyə Ərəbistanının “Əl-İttifaq” komandasını çalışdıran Stiven Cerrard yetirmələrinin məşq vaxtlarını vaxtilə kapitanı olduğu “Liverpul”un oyun saatlarını nəzərə alaraq müəyyənləşdirdiyini etiraf edib.
“QELEBE.AZ” xəbər verir ki, ingiltərəli baş məşqçi bunu internet televiziya kanalının efirində söyləyib.
Mersisaydlıların yetirməsi olan və 1998-2015-ci illərdə onların heyətində çıxış etmiş Cerrard komandanın oyunlarını izləmək üçün Səudiyyə klubunun məşqlərini məhz gecə saatlarına təyin etdiyini boynuna alıb.
“Liverpul”un oyun günlərində məşqlər? Onlara (“Liverpul”un oyunlarına – red.) az diqqət vermirəm. Bütün cədvəlimiz “qırmızılar”ın matçlarını nəzərə alaraq tərtib edilib. Oyunçular mənə qarşı kin bəsləyirlər: bəzən axşam saat 9 və ya 10-da məşq edirdik”, – o vurğulayıb.
Qeyd edək ki, Səudiyyənin yerləşdiyi saat qurşağı Britaniyanınkını iki saat qabaqlayır. Məsələn, yerli vaxtla 15:00-da başlayan İngiltərə Premyer Liqası matçları Səudiyyə vaxtı ilə 19:00 radələrində başa çatır.
Cerrard 2023-cü ilin iyulundan “Əl-İttifaq”a başçılıq edir. Cari mövsümdə 44 yaşlı mütəxəssisin çalışdırdığı komandanın nəticələri elə də ürəkaçan deyil: mümkün 21 xaldan cəmi 10 xal. Ötən mövsümü isə “Dəhnənin cəngavərləri” altıncı pillədə bitirmişdilər.
Daha əvvəl Cerrard baş məşqçi kimi Şotlandiya “Reyncers”i və İngiltərə “Aston Villa”sını çalışdırıb. Qlazqo təmsilçisi ilə yerli çempionatın birincisi olan Cerrardın Birminqemdəki fəaliyyəti isə uğurlu olmayıb.
“Qırmızılar”ın əfsanəsi olan İngiltərə millisinin sabiq üzvü “Liverpul” tarixinin ən yaxşı futbolçusu hesab edilir. Cerrard “Liverpul”un heyətində 710 matça çıxıb və 186 qola imza atıb.
Xatırladaq ki, apreldə “Liverpul”un misirli hücumçusu Məhəmməd Salah “Mançester Yunayted”lə səfər qarşılaşmalarında 5 qol vurmuş “Liverpul”un sabiq kapitanı Stiven Cerrardın rekordunu yeniləmişdi.
Fevralda nüfuzlu “FourFourTwo” jurnalı ingiltərəlini ən yaxşı britaniyalı futbolçular siyahısına əlavə etmişdi. Eyni dərgi İngiltərə Premyer Liqası tarixinin ən yaxşı 100 futbolçusunun reytinqində sözügedən idmançını yeddinci yerə layiq görmüşdü.
