Braziliya millisinin sabiq futbolçusu Avstraliya klubuna keçib

Braziliya yığmasının sabiq futbolçusu Duqlas Kosta Avstraliyanın "Sidney" klubuna keçib.

"Report" xəbər verir ki, bu barədə "Yaşıl qitə" təmsilçisinin mətbuat xidməti məlumat yayıb.

"Bavariya" (Almaniya), "Yuventus" (İtaliya) kimi məşhur klubların formasını geyinmiş 33 yaşlı vinger Avstraliya təmsilçisinə azad agent kimi transfer olunub.

Qeyd edək ki, son mövsümü Braziliyanın "Fluminense" klubunda keçirən hücumçu 15 oyunda meydana çıxıb. O, 2014-2018-ci illərdə formasını geyindiyi Braziliya millisində meydana çıxdığı 31 oyunda 3 qol vurub.