Rəşad Sadıqov: “Çox “ucuz qollar” buraxırıq”

“Çox “ucuz qollar” buraxırıq. Bunlar xüsusilə də önəmli oyunlarda baş verir. Bilmirəm, psixolojidir, ya nədirsə, bir şəkildə yoluna qoymağa çalışacağıq”.

Bunu “Zirə”nin baş məşqçisi Rəşad Sadıqov Azərbaycan Premyer Liqasının XII turunda “Neftçi”yə böyük hesablı məğlubiyyətdən sonra CBC Sporta açıqlamasında deyib.

Gənc mütəxəssis rəqibi qələbə münasibətilə təbrik edib: “Neftçi” bizdən daha yaxşı oynadı. Bizdə planladığımız bir çox şey alınmadı. Oyunun gedişində dəyişməyə çalışdıq, ancaq nail ola bilmədik. Rəqib layiqli qələbə qazandı”.

Sadıqov qeyd edib ki, ilk qola qədər hər şey qaydasında olsa da, sonradan oyuna nəzarəti itiriblər: “Planımız işləyirdi. Mərkəzdə topa sahib olub rəqibi əks hücumda tutmağa çalışırdıq. Amma təəssüflər olsun ki, lazımsız top itkilərinə yol verdik. Buraxdığımız qoldan sonra isə toparlanmaq çətin oldu. İkinci hissəyə də pis başlamadıq, buna baxmayaraq, yenə asan qol buraxdıq”.

Növbəti turda oynayacaqları “Qəbələ” ilə matç haqqında qısa danışan baş məşqçi oyunun onlar üçün çox önəmli olduğunu və xüsusi hazırlaşacaqlarını qeyd edib.

Qeyd edək ki, “Zirə” – “Neftçi” matçı qonaqların 3:0 hesablı darmadağını ilə başa çatıb.