Avropa çempionatı: Azərbaycanın daha 5 cüdoçusu mübarizəyə başlayır

Bosniya və Herseqovinanın paytaxtı Sarayevoda 23 yaşadək cüdoçular arasında Avropa çempionatı davam edir.

“QELEBE.AZ”un məlumatına görə, bu gün daha 5 Azərbaycan cüdoçusu mübarizəyə qoşulacaq.

81 kq çəki dərəcəsində yarışan Məhərrəm İmamverdiyev monteneqrolu Nikola Stanisiç ilə üz-üzə gələcək.

90 kq çəkidə çıxış edən İsmayıl Zamanov isə Böyük Britaniya cüdoçusu Rayan Riksen Salmanla mübarizəyə start verəcək. O, bu rəqibini keçəcəyi təqdirdə növbəti mərhələdə Fransis Damyeri (Fransa) sınağa çəkəcək.

100 kq çəkidə isə Ruslan Nəsirli niderlandlı Kilian Bultuislə qarşılaşacaq.

Qadınların yarışında isə iki Azərbaycan təmsilçisi tatami üzərinə çıxacaq.

70 kq çəkidə Südabə Ağayeva mübarizəyə Sesilya Betemslə start verəcəksə, 78 kq-dakı təmsilçimiz Nərmin Əmirlinin ilk rəqibi serbiyalı Yovana Stepanoviç olacaq.

Qeyd edək ki, yarışın ilk günündə Azərbaycan təmsilçilərindən Nazir Talıbov (60kq) qızıl, Kənan İsmayılov (60 kq) və Könül Əliyeva (48 kq) isə gümüş medal qazanıb.