Azərbaycanın U-19 millisinin baş məşqçisi: İkinci yer bizim üçün yaxşı nəticədir

Komandanın oyunlarından razı qaldım. İkinci yer bizim üçün yaxşı nəticədir.

Bunu “QELEBE.AZ”a açıqlamasında Azərbaycanın 19 yaşadək (U-19) oğlanlardan ibarət millisinin baş məşqçisi Elxan Abdullayev Moldovada təşkil edilən yoldaşlıq turniri ilə bağlı fikirlərini bölüşərkən deyib.

O, turnirdə məqsədlərinin yaxşı oyun sərgiləmək olduğunu söyləyib: “Turnirdə ikinci olduq. Türkiyə millisi bizdən 1 yaş böyük uşaqlarla çıxış edirdi. Yəni U-20 idi, heyətdə 2005 təvəllüdlü futbolçular oynayırdı. Bundan əlavə, Türkiyə elit-raundu keçən komandadır. Qarşıda onları Fransa, İspaniya və Danimarka ilə qrup oyunları gözləyir. Ona görə də yarışın favoriti sayılırdılar. Yəni bizimlə eyni səviyyədə olan rəqib deyil. Məqsədimiz sırf Türkiyə millisini udmaq deyil, yaxşı futbol göstərmək idi. Nəticə də çox önəmlidir. Bir ildən çoxdur beynəlxalq oyunlarda çıxış etmirdik. Noyabrdakı yarışa hazırlaşırıq. Moldova millisi də rəqibimiz olacaq. Mənfi və ya müsbət tərəflər var idi. Bu yaşda olan komandada çatışmazlıqlar çox olur. Çox işləmək, irəli baxmaq lazımdır. Futbolçular üçün böyük təcrübədir. Fikrimcə, çox yaxşı turnir idi. Belə turnirlər nə qədər çox olsa, millimiz və futbolçularımız üçün bir o qədər müsbət hal sayılır”.

Baş məşqçi noyabra qədər daha 3 toplanış nəzərdə tutulduğunu vurğulayıb: “Avqust, sentyabr və oktyabr aylarında təlim-məşq toplanışı olacaq. Hələ ki, rəqiblərimiz bəlli deyil, kimlərlə, hansı turnirdə oynayacağımıza qərar verməmişik”.

Qeyd edək ki, U-19 turnirdəki ilk iki matçında Qazaxıstan yığmasına 2:0 hesabı ilə qalib gəlib, Türkiyə millisinə məğlub olub - 0:5. Komanda sonuncu görüşdə Moldova ilə heç-heçə oynayıb - 1:1.