Qusarda buzadırmanma festivalı keçirilib

Azərbaycan Alpinizm Federasiyası Qusarın Laza kəndi yaxınlığındakı donmuş şəlalələrdə növbəti buzadırmanma festivalı keçirib.

“Report” xəbər verir ki, festivala 76 nəfər qatılıb.

İştirakçılara müxtəlif mürəkkəblik dərəcəsində marşrutlar təqdim olunub. İdmançılar mürəkkəblik və sürət disiplinlərində öz qüvvələrini sınamaq imkanı qazanıblar. Təşkilatçılar buzadırmanma ilə yeni tanış olanlar üçün təlim dərsləri keçiriblər.

Azərbaycan Alpinizm Federasiyası alpinizmi, buzadırmanmanı qayayadırmanmanı, draytulinqi, idman dırmanmasını, skayranninqi və dağ turizmini təbliğ və inkişaf etdirir.

Qeyd edək ki, Beynəlxalq Olimpiya Komitəsi buzadırmanmanın Qış Olimpiya Oyunlarının rəsmi proqramına daxil edilməsi üçün iş aparır.