Azərbaycan minifutbol millisi Türkiyə yığması ilə qarşılaşacaq
https://mail.qelebe.az//uploads/photo/azerbaycan-minifutbol-millisi-turkiye-yigmasi-ile-qarshilashacaq.webp
Azərbaycan minifutbol millisi Türkiyə yığması ilə yoxlama görüşü keçirəcək.
Bu barədə “Report”a yığmanın baş məşqçisi Elşad Quliyev məlumat verib.
O bildirib ki, hazırda Antalyada təlim-məşq toplanışında olan komanda orada 3 yoxlama görüşü keçirməyi planlaşdırır: “Rəqiblər Türkiyə komandaları olacaq. Növbəti həftədən qarşılaşmaların təşkili nəzərdə tutulub. Rəqiblərdən biri Antalya təmsilçisi, digəri isə Türkiyə millisi olacaq”.
Baş məşqçi dünya çempionatının keçiriləcəyi Birləşmiş Ərəb Əmirliklərində də 2 yoxlama görüşü keçirəcəklərini söyləyib: “Oktyabrın 24-25-də Dubayda son sınaq matçlarımız olacaq. Orada daha güclü komandalarla görüşəcəyik”.
Qeyd edək ki, Azərbaycan millisi dünya çempionatının G qrupunda İraq, Misir və Tunislə mübarizə aparacaq. Elşad Quliyevin yetirmələri ilk görüşü oktyabrın 27-də İraqa qarşı keçirəcəklər.
